van die Krokodilstad deur Frederik Rudolph van Dyk

durf ek tongel
van hierdie tyd
hierdie Nelspruit
(want geseg 'hierdie ruimte' is my nie beskore)

waar bosveldloeries seen afwapper
oor die snelgroeiende skilpadstad
die sierlike pouveerplek
hier slaan die immigrante flambojant
sy wortels in lanings vas
en produseer voor die neuse van braaivleis-politici

en hier is geleenthede
tussen winde van suikerriet-saad en stuif
hier is niesreent wat jou hare bevrug
hier was nog altyd vrugbare valleie

hier is tande van geld- en goddelike groei
en skole soos pote
en 'n waterskubstert wat,
ewe meanderlik, ons diepste dasein
'n liefstekie gee

Foto: Ronell Marais, Kaapschehoop, naby Nelspruit.